القاهرة : أ ك ف .

أثار سؤال وجهته عضوة في مجموعة رعاية للتصلب المتعدد MS Patients in Egypt على فيسبوك الشجون بين الأعضاء خاصة ومستخدمي الموقع عامة، ورغم حالة التأثر العامة التي أصابت الأعضاء بسبب السؤال ، إلا أن الردود الكثيرة التي وردت، والتي كان الإيمان بالله القاسم المشترك بها رفعت الأمل لهذه الفئة من المرضى.

وجهت Halla Ahmed حلا أحمد سؤالها المؤثر في 8 مايو 2017، قائلة "لوسمحتوا هو M.S بيموت وعوزه إجابه بصراحه من غير تجميل كده كده هنموت بس عوزه اعرف بجد هو بيموت".

و M.S إختصار لمرض التصلب المتعدد Multiple Sclerosis، وهو التهاب ينتج عن تلف الغشاء العازل للعصبونات في الدماغ والحبل الشوكي، ويُعطّل هذا التلف قدرةَ أجزاءٍ من الجهاز العصبي على التواصل، مما يؤدّي إلى ظهور عددٍ من الأعراض والعلامات المرضية، منها أعراض عضوية أو إدراكية عقلية، وأحياناً تكون على شكل مشاكل نفسية.

بمجرد نشر السؤال انهالت الرود عليه :

Ahmed Mahmoud : آه والله هنموت وكلنا هنموت، بس مش من الإم إس لا ، من الخوف من الإم إس، الإم إس مش كانسر ومش نزلة برد، الإم إس مرض مزمن ، بتظبيط شوية حاجات هنعيش شبه الناس الطبيعيين لحد ما ربنا يريد.

Eibernsesa Alaa Lolo : يعني هو هيفضل معنا علي طول؟

Ahmed Mahmoud : أيوة للأسف دي إرادة ربنا، ومحدش عارف بكرة في إيه، الإم إس مرض مزمن زي السكر والقلب والضغط.

Mostafa Ezzat : لا مش مرض بيموّت .. لو اتعالج.

العنقاء ياسوه : تعدد الأسباب والموت واحد، حتى لو الإم إس بيموت، ف دا سبب مش أكتر، تفاءل بالله خير

Sarah Kamel :  إلام إس زي السكر والضغط بالظبط، أمراض مزمنة، الإنسان بيتعايش معها بلاش سوداوية، مريض الإم إس في نعمة من الله، وكفاية إنه أرحم من أمراض كتيييييير جدا.

المتوكلة على الله : مرض غير مميت وغير معدي.

Sarah Kamel : لا تنسى مريض السكري مثلاً يفقد بصره، وممكن يتعرض للبتر وتآكل أعضائه، وكذلك مريض الضغط العالي ممكن يحصله عمي، أو جلطات أو انفجار بالمخ، كل الأمراض بالتعايش تصبح آمنة، بالإهمال تصبح خطر.

هدى الخواجة : تفاءلوا بالخير تجدوه، لن يموت انسان الا بيوم مكتوب له من وقت ولادته.

Shady Koura : في حالة واحدة بس، لو اديناله الفرصه، وساعدناه علي كدا.

Abdelmasseh Farouk Baba : فين الحاله دي علشان أتعرف عليها، مفيش حد مات من الإم اس يا بنتي، محدش يضحك عليكي يا بنتي

Abdelmasseh Farouk Baba : لو حد استسلم لقهر الإم اس وخد قرار انوا مستني الموت هيوصل له وبسرعة.

Dina Hassan : لا للأسف ما بيموتش بيعذب بس طول العمر، يلا الحمدلله على كل شئ.

Dina Zamzam : الموت مش محتاج إم إس أو غيره!! ، لكنه ليس مرض قاتل، ده مش أورام خبيثه وأكيد اقل من الأمراض المزمنة الأخري.

No Ga : ياجماعه والله الحمدلله والشكر لله، ابتلاء ربنا لينا رحمه، كلنا هنموت، ولكل أجل كتاب ده بس اختبار، وكل حاجه فيه بثواب، وكفايه إن ربنا مش بيختار أي حد، العبد المبتلي أحب لله عزوجل .

ذكريات أيام جميلة : كان فيه دكتور أجنبى بيعالج بدون أدوية، أو أى عقاقير عارفين بيعالج ازاى، انك انتا تعيش كانك مفكش أى حاجه، يعنى ما تفكرش انك مريض أوى أى حاجه، عيش حياتك بكل ما فيها، خليك قريب من ربنا وصدقنى عمرك ما هتحس بأى تعب اه والله، وياما على الدنيا اللى شايل اكتر منك، والله فيه ناس همومها اكتر منك، قول ياااارب.

يذكر أن جمعية رعاية للتصلب المتعدد جمعية مصرية عنوانها 9011 شارع 72 ، معهد الجزيرة ، المقطم ، القاهرة ، وهي تعني برعاية مرضى التصلب المتعدد، وتقديم الدعم النفسي والعلاجي لهم، ويمكن التبرع للجمعية على حساب رقم 3011791 ، بنك الشركة العربية المصرفية ، فرع القطامية.